ஒரு பொய் பற்றிய உண்மைகள்

மனதை எவ்வளவுக்கெவ்வளவு 

அழுக்காக்கி விடுகிறோமோ 

அவ்வளவுக்கவ்வளவு 

உதடுகளை அழகாக்கி விட்டு

பொய்யொன்றை சொல்ல ஆரம்பிக்கலாம் 

பொய்கள் மூன்று வகைப்படும் 

நம்பக்கூடியது,நம்பக்கூடியது,நம்பக்கூடியது

மூன்றை பற்றிய விளக்கம் உங்களிடமிருந்தால் 

நீங்கள் ஒரு தலைசிறந்த பொய்காரனாகும் 

வாய்ப்பு பிரகாசிக்கும் 

பொய்கள் பற்றிய விளக்கங்கள் அறிய 

நாடவேண்டிய இடங்கள் 

காதலர் கடலை போடும் கடற்கரைகள் 

பீச் பார்க் சினிமா 

பொதுவாக பொதுவான இடங்கள் 

அழகில்லா பெண் பற்றிய பொய்யொன்றை 

திருமண தரகரிடமும் 

அழகான பெண்பற்றிய பொய்யொன்றை 

அவள் நண்பியிடமும் 

அறிந்துகொள்ளப்பழகுங்கள் 

அர்த்தமுள்ள பொய்யொன்றை 

மானமுள்ள ஏழையிடமும் 

அவசரப் பொய்யொன்றை 

அயல் வீட்டுக்காரனிடமும் அறியலாம் 

ஆவலேற்றும் பொய்யொன்றை 

அரசியல்வாதியிடமும் 

பெருமை பற்றிய பொய்யை 

சினிமா நடிகனிடமும் 

அலைச்சல் தரும் பொய்யை 

கடனாளியிடமும் 

எரிச்சல் தரும் பொய்யொன்றை 

எதிரியிடமும் பெற்றுக்கொள்ளலாம் 

பொய்களின் தத்துவம் இரண்டு வகைப்படும் 

இனிக்கச்சொல்லுதல்,இனிக்கச்சொல்லுதல் 

கணவன் பற்றிய மிகச் சிறந்த 

கேவலமான பொய்களை பெண்களும் 

மனைவி பற்றிய மணிமணியான 

பொய்களை ஆண்களும் 

எதிர்பார்க்கின்றார்கள் 

நிறைந்த எதிர்பார்ப்புக்கள் பொய்களின் உயிராகின்றது 

பொய்கள் சுயநலமானவை 

உங்களுக்கான பொய்கள் உங்களிடமிருந்தே 

ஆரம்பிக்கின்றன 

சுதந்திரம் பற்றிய பொய்களை தமிழரிடமும் 

சமத்துவம் பற்றிய பொய்களை பெண்களிடமும் 

சொல்லுங்கள் சந்தோசப்படுவார்கள் 

இப்போதும் உங்களால் 

பொய்சொல்ல இயலவில்லை எனின் 

கொஞ்சமாவது என்னிடம் கற்றுக்கொள்ளுங்கள் 

அப்போது தான் நீங்கள் 

பூரணமான மனிதன் என்பது உறுதியாகும்

 

நீ,நான், நாம்,அது.

நீ

மதுக்கோப்பை நிரம்பி வழிய 

குமைந்த உதடுகளால் பச்சை முத்தமொன்றை 

ஒற்றைப் பிசுபிசுப்பை 

ஞானியாதல் பற்றிய விளக்கத்தை தருகிறாய் 

ஞானமென்பது முத்தம் இறந்த இடத்தில் முதிர்வது 

நீயென்றால் நீயாகவும் இருக்கலாம் 

நான் 

அங்கொன்றும் இங்கொன்றுமாய் 

மாறுமுன் காத்திரமான அலைவுகட்குள் 

ஜீவிதமுற்றுக் கிடக்கின்றேன் 

இடைவெளிகளை நிரப்ப இடைவெளிகளை 

எடுத்துவருகின்றேன் 

வெறுமையின் இருப்புகட்குள் படர்ந்துயிர்க்கின்றேன் 

நானென்றால் நானாகவும் இருக்கலாம் 

நாம் 

உதடுகளுக்கு காது முளைக்கையில் 

மீண்டும் சூன்யவெளிக்குள் மறைகின்றோம் 

அது 

இங்கும் அங்கும் 

இல்லாத இடமொன்றில் இருக்கின்றது 

இப்போது அவ்விடத்தில் 

நீயும் நானும் இல்லை

உயிரைப் போலொரு வலி

காதலெனும் புத்தகத்தை இரவல் வாங்கிப் 

படிக்க வந்தவள் போல் நீ 

உன் வேதனை நிரம்பி வழியும் 

திருவிழாக் கூட்டம் போல் நான் 

நீயே கடவுளாகிறாய் 

உயிராகிறாய் 

பேருருவாய் வளர்ந்து எனை தின்கிறாய் 

வெற்று உயிராகி நானே 

காவுகொள்ளென்று காத்திருக்கிறேன் 

சொற்கொலை 

மண்டியிட்டு முகம் புதைத்து 

அதே கூட்டத்தில் நானுமிருக்கிறேன் 

நீயுமிருக்கிறாய் அதுவுமிருக்கிறது 

அதுவென்றால் எது ?

இது ....

 

எதிர்பார்ப்பு

உயிருடன் இறந்து விடுதல் பற்றிய குறிப்பொன்றை 

நீங்கள் எழுத முயற்சித்திருக்கலாம் 

நானும் அந்த முயற்சியில் 

தோற்றிருக்கிறேன் பலமுறை முயன்று,

ஒரு ரணத்துடன் 

ஒரு மிகப்பெரும் வலியுடன் நீங்கள் வாழமுடியுமெனின் 

அப்படியான குறிப்பொன்றை எழுத முயற்சியுங்கள் 

அப்போதும் உங்களுக்கு ஏமாற்றமே மிஞ்சும் 

நீங்கள் ஒரு கவிதையை எழுத முயற்சியுங்கள் 

ஒரு தேடல் பற்றிய விளக்கம் உங்களிடம் இருந்தால் 

ஆரம்பிக்கலாம் 

அது மிகவும் இலகுவானதொன்று 

ஒரு கவிதையை கவிஞன் தான் 

எழுத வேண்டுமென்றில்லை 

குழந்தை கூட அழுகிறதே 

நீங்களும் என்னைப்போல் காதலிக்க ஆசைப்பட்டிருக்கலாம் 

காதல் பற்றிய இலவச குறிப்புக்கள் 

கசாப்புக்கடையிலே வழங்கப்படுகின்றன,இருந்தும் 

காதலின் தெய்வம் கசாப்புக் கடைக்காரனென்றால் 

உங்கள் ஊகம் தவறானது 

நீங்கள் குழந்தையாவதை பற்றிக் 

கற்றுக் கொள்வதென்றால் என்னிடம் வாருங்கள் 

நான் உங்களுக்கு சொல்லிதருவதற்காய் அல்ல 

நானும் கற்றுக்கொள்ள 

ஆசைப்படுகின்றேன் 

மரணம் பற்றி உங்களை விட நான் தெரிந்து கொள்ள 

விரும்புகின்றேன் 

காரணம் எனக்கு வாழப்பிடித்திருக்கிறது.

இந்த கவிதை பற்றி என்னிடம் நீங்கள் விளக்கம் 

கேட்டால் நிச்சயம் தோற்றுப்போவீர்கள் 

காரணம் இது கவிதையில்லை

 

என் நினைவுகள் 

புணர்ந்த இரவுகள் 

பிரசவிக்கும் 

அழகிய கனவு நீ 

உன் உதடுகளை 

பிழிந்தேன் 

கிடைத்தது 

உயிரின் சுவை 

வா பெண்ணே 

மேகத்தின் நிழலில் 

இளைப்பாறுவோம்

கிளிச்.... உதடுகளின் அசைவுகள்

துளிகளின் சத்தத்துடன் இசைகிறது 

ஒரு புன்னகை 

குழந்தையொன்றின் மிழற்றலாயும் 

இறை துயிலொன்றின் நிச்சலனமாயும்

மீண்டும் ஒரு புன்னகை 

மேகத்தைப் பிளந்து வருகின்றது 

மண்ணின் உயிர்வாடை வீ சத்தொடங்கியது 

வெம்பிய கனவுகளுடன் ஈரத்தில் 

ஒட்டியும் ஒட்டாமலும் 

அடுத்து மிகப்பெரிய சிரிப்பொலி 

காலத்தின் துயரொலித்த பாடல் 

பீரங்கி முழக்கமாயும் தோட்டா அலறலாயும் 

அனாதைகளின் கூடாரத்தை நனைக்கிறது-இது

கடவுளின் கவனயீனம் 

இப்போது ஒரு மௌனிப்பு 

உலகமே ஈரம் சுகித்துக்கிடக்கின்றது 

காலச்சக்கரத்தின் ஒருமுனையில் மரங்களின் 

புத்தாண்டு 

மறுமுனையில் ஏழை ஒருவனின் கண்ணீர்துளிகள்

 

மூன்று முத்தங்கள்

 இச்....

மௌனம்

ஒட்டிக்கொள்கிறது இன்பப்பிசுபிசுப்பு 

நச்சென்ற சுவை

இச்...இச்...

மூச்சுப் பிரளயத்தின் ஆராதனை 

உதடுகளின் திரையைக் கிழித்தெறிந்தாய் 

உயிரின் சாம்பல் காலடியில் வீழ 

இதழ்ப் பிளவுகட்குள் 

நினைவுகளின் தூசி

இச்..இச்...இச்...

விழிகளை மெல்ல மூடி 

கன்னங்களை அர்ச்சித்து விட்டு நகர்கிறாய் 

தகனம் வியர்க்கும் வெயிலை 

அள்ளிப் பூசிக்கொள்கிறேன் உடலெங்கும் 

அரவமில்லாப் பொழுதொன்றில் 

தப்பிய வார்த்தைகளை சாகடிக்கத் தயாரானாய் 

இனி நான்காவது முத்தம்.....

 

அனன்மியாவின் அழகான பொய்களும் அர்த்தமில்லா உண்மைகளும்

விண்மீன்கள் நடைபயிலும் வெள்ளை

இரவொன்றில்

குழந்தையானாய்-தேன் குழைத்த அப்பமென

நிலவைக் காட்டிப்

புன்னகைக்கக் கற்றுக்கொண்டாய்'

குட்டிச் சிலேட்டுக் குச்சிகளில் அழகுக் கிறுக்கல்களாயுன்

பெருமைகளை காட்சியிட்டாய்

அரைநாளில் வரைந்த ஓவியத்தை

இருநொடியில் கிழித்ததாய்..!!

நிஜங்களை நடிப்பதாய் சொல்கிறாய்-உன்

நாடகத்தை புரிந்து கொள்ள முடியாது செல்கிறேன்

கறுப்புப் புள்ளிகளை காட்டிப்

பேய் என்று நடுங்கித் தோளில் சாய்கிறாய்

நட்சத்திரங்கள் பத்தை தின்றுவிட்டு

வெள்ளை மரங்களுக்குள் ஒளிந்து கொள்ளும்

இரு தலைப் பச்சைக் காகமெனவும்...

இருந்தும் உன் பொய்கள் அழகானவை

உன்னிடமிருந்து அன்பைப் பற்றிய

வார்த்தைகள் வருவதில்லை-அதன் இலக்கணங்களே

நிரம்ப வருகின்றன ..!!

 

மோகத்திலிருந்து கவிதைக்குள் ....

இசைப் பிம்பமொன்றின் மொழிகளை தனதிதழ்

அசைவில் கீறல் கீறலாக்கிப் 

பெயர்த்தெறிந்தாள்

காய்ந்து போன உதடுகளால் மூன்று

முத்தங்கள் தந்தாள்,பிடரிமுடியைக் கோதி

சர்ப்பவிரல்களால் பிணைந்திருந்தாள்

நொடிகள் கசிய உருகிய பார்வையில்

பரஸ்பர உரையாடல்களைத் திணித்தாள்

வார்த்தைகளைக் காணமுடியாதிருந்தது

உயிர்களுக்குள் நசுங்கியோ இல்லை

உடல்களுக்குள் சபிக்கப்பட்டோ இறந்திருக்கலாம் 

என்னே..!! நளினமான செய்கையால்

கலைவந்தெழுந்தாடிப் பற்களாலென்

மார்பைக்கடித்து வெளுறிய உதடுகளை

சிவப்பாக்கிச் சிரித்தாள் ..!!

வலியுயிரேறி கைகளாளவளை உதறித்

தனித்தபின்னென் சாணக்கியத்தனமான

புன்னகையொன்றை வீசினேன்

எனது கவிதை பற்றிய கவிதைகளை அவளிடம் காட்டினேன்

மிரட்டல் பார்வையுடன் மௌனம் கனிந்தாள்

கூடவே அவள் விழிகளிலிருந்து

விடைபெற்று வந்தன

கவிதை பற்றிய விளக்கங்களின் உயிர்மை

மௌனமொன்றால் இறந்தவன்

உலகின் இறுதி மூலையொன்றின் 

நினைவொன்றை சுமந்தவாறே 

உயிரிழந்து கிடந்ததந்த மௌனம் ....

நொடிகளை கசக்கிப் பிழிந்தவாறும் 

உயிரைத் துண்டாக்கிச் சிதைத்தவாறும் 

பிரிவின் பெருந்துயரம் நீண்டது 

மௌனம் சாதித்தல் பற்றி ஆராய்ந்தவன் 

தொண்டைக்குழிவரை பீறிட்ட 

சோகத்தை அடக்கத்தெரியாதவன் 

கூவிக் கூவியழுதான் ....

அன்பே..!! நீ கொன்றுபோட்டிருந்தாய்-

மனதைச் சிதைத்தாலும் அர்த்தம் காணா 

ரணங்களைத் தருகின்றவள் பெண்..?

கண்ணீரின் விளக்கமறியாதவனும்

மரணத்தை மதிக்காதவனும் என்னுலகில்..

மீண்டும் மனமிழுத்தழுமோர் நொடியில் 

குருதி காய்ந்து மரத்துப் போன 

மௌனத்தைச் சுமந்தவாறே காதல் வரும் ,இறுமுறியின்றி 

கல்லாய்ப் போன கன்னியின் பார்வை வரும் 

கூர்மை ததும்பிய அமைதியாலவள் 

கூறு போட்டுக் கிழித்த கவிதையின் மீதம் வரும் 

அத்துன்பமெழுமொருநாளிலென் 

மரணவுடல் முழுவதுமவள் படர்ந்திருப்பாள் 

மௌனம் மரணம் சார்ந்ததெனவுணராதவள்.!!

இதயங்கள் எழுதியவை

மொழிகள் இளகியது 

நாளொன்று அழகாய்ப் படர்ந்தது 

விழியளைந்த பொழுதொன்றை உன் 

நினைவுகள் வாங்கியது -தீயொன்று 

தீர்ந்துபோனது,

கனவொன்றுன் அறிகுறிகளைப் பதிவு செய்தது

எதிர்பார்ப்புகளும் ஏமாற்றங்களும் 

புதிது புதிதாய்ப் பிறந்தன 

நீண்ட சோகத்தையும் நிலையான பிரிவையும்

உன் தூரங்கள் உணர்த்தின 

காற்றைப் போலவே கவிதையும் காதலும் 

உன்னை வாரித்தூற்றி என்னுள் எறிய .....

உயிரில் செறிந்தவளே ..!!

காதலில் தேறிய என்னுயிரை எடுத்துவருமென் 

கடிதங்களை என்ன செய்வாய்...??

பகல் பொழுதுகள் நீண்ட நாளொன்றிலுன் 

பதில் கடிதம் ....

பிரியமான காதல் அகதியே ...!!

உன் ஆழ்மனதில் சுதந்திரக்காற்றை 

என் பேனாக்கள் குடித்தழித்து விட்டன 

மன்னித்துக்கொள் ...!!

(என்னை உணரத் தயாரானாய் நீ )

தேடிய பெண்ணும் தெவிட்டாத உரையாடலும் _1 (காதலாகிக் கசிந்தவர்களுக்கு)

சாயம் கசிந்த உதடுகளால் என்னைக் 

கொன்று உயிருறிஞ்சிக் குடித்தபின் மௌனமானாள் 

விழிகளால் மொழிகளை காயம் செய்தாள் 

சூரியப்பொழுதொன்றில் குளிராகி 

ஈரம் உறிஞ்சிய பின்னும் தீயாகிப்படர்ந்தாள் 

நரம்புக்குள் ஏறி நடைபழகித்திரிந்தாள் 

உயிரீரம் குழைத்து கனவுக்குள் இறங்கிவந்தாள் 

முத்தங்களை சூடேற்றியும் மூச்செரித்து விடைபெறவும் 

காலமழிக்காத காதலிப்போது கனிந்தது,

சுட்டெரித்த அவள் நினைவுகளால் சுழன்றெழுந்து 

உணர்விழந்தடங்கிச் சாய்ந்தேன்,

உருகியெழுந்த காதலினாலுயிர் மிழற்றிச் சாய்த்தாள் 

வார்த்தைகளால் விளையாடிச் சலிக்கவும் 

உயிரின் மெல்லிய நாண்களை வீணை போலவள் 

விரல் மீட்டிச்செல்லவும் அறிந்திருந்தாள் 

நீண்ட இடைவெளியைக் குருடாக்கி வெளிவந்து 

தீர்ந்த உரையாடலோ காதல்வயப்பட்டு வீழ்கிறது 

காலம் நினைவுகளை ஆழ்கிறது ...!!

(பெண்ணே காதல் என்றால் என்ன ...?

இரண்டு கனவுகள்

இரவு 10.30

ஆழ்மைக்குள் அமிழ்ந்திறங்கிக்கொண்டிருந்தது 

அத்தகைய அமைதி தேடிய இரவு 

உடற்சுவடுகளற்றிருந்த மென்மை பொருந்திய

இரண்டாம் உலகின் முதலாம் அத்தியாயத்தில்

இறங்கிக்கொண்டிருந்தேன் 

இருளின் போர்வை களைந்து வெளித்தது 

அவளுருவம்,அத்தனை மரண இரவுகளும் 

அவள் உதடுகளின் பள்ளத்தில் இளைப்பாறிவிடும் 

நிழலில் அவள் உயிர்மை நிறைந்து 

வழிந்துகொண்டிருந்தது 

நான் அவளுக்குள் ஆழ்ந்திருந்தேன் ,பிரபஞ்சத்தின் 

அத்தனை நட்சத்திரங்களையும் மொத்தமாய்ப் போர்த்தியிருந்த 

குளிர் தாங்கா அவள் விழிகள் சிந்திய 

காதல் தோய்ந்த இழைகளிலிருந்து வீழ்ந்தான் 

நானின் குழந்தையாகிப் பின் இளைஞனான 

என்னின் கிழவன் ....

பின்னிரவு 1.30

கரியாக உறைந்தது விடியலின் நட்சத்திரம் 

பொழுது புலரா நொடியொன்றுடன் கூடிய 

மரணக்காற்று ஆரத்தழுவியது,

அவள் உதடுகள் வெடித்துப் புண்ணாகிச்சிதைந்தது 

விழிகளில் நஞ்சுறைந்த வஞ்சகம் 

நீலப்பற்கள் செறிந்த உடலில் துப்பாக்கியும் 

கோர்த்த அவள் சோதரரும் ...!!

நசுக்கப்பட்ட என் நாட்டில் மிச்சமாய் இருந்தது 

திரோயின் குதிரையின் படிமம் 

உலகம் கவிழ்ந்து வீழ்ந்து தலைகீழானது 

சேயின் முலையில் வாய்வைத்துறிஞ்சினாள் தாய் 

என் சோதரரே ..!!

வஞ்சக வயல்களில் நீர் விதைக்கப்பட்டிருந்தீர்

காலை 6.30

குப்பிவிளக்கொன்று வாங்க 

சூரியனை விற்றுக்கொண்டிருந்தேன் நான் ...!!

(பிற்குறிப்பு : கனவை விளங்கிக் கொள்ள முடியாதவர்கள் 

கனவுகாணத் தகுதியற்றவர்கள் )

 

தனித்த பெண்ணும் தகாத கவிதையும்

எண்ணங்களை உதறிவிட்டு 

நெகிழ்ந்து படுத்திருந்தது மனம் 

என்றுமில்லாதது போல் இன்றவள் 

சூரியனைப் பிடித்து விரல்களுக்குள் நசுக்கியும்

நட்சத்திரங்களை உடைத்தென் கூரைமேல் 

எறியவும் பழகியிருந்தாள் 

என் கிழிந்த கவிதையொன்றை 

வெகுவாய் மெச்சினாள் பாராட்டினாள் 

அந்த நாளில் அவள் காதலன் பிரிந்ததையும் 

விரகதாபத்தில் கைகள் ஊடறுத்து 

உடல் மேல் ஊருவதையும் வெட்கமேயின்றி 

கவிதைக்குள் அவளால் கக்கமுடிந்தது 

விம்மிப் புடைத்திருந்த அவள் உடல்மேல் 

தகித்துப் படர்ந்தன இச்சை நரம்புகள் 

உதடுகள் வெடித்துக் கசிந்தது 

உருகி வழிந்து தாள்களை நனைத்தாள் 

சூடான முத்தத்தை ஆராதிக்கின்றேன் 

ஒரு முறை உன் வலிமையை என்னில் திணி 

உடை தாங்கிய உன் கவிதையை வெறுக்கிறேன் ...??

ஆடையைக் கிழித்தேன் 

கவிதை நிர்வாணமானது 

அன்பானவளே ..!!

இப்போது பிடிக்கின்றதா உனக்கென் கவிதை...?